政情：孫蔡吐媚印度設廠 笑談文化差異
俗語話入鄉隨俗，港商去到世界各地投資設廠同樣要適應文化差異。做服裝商標織造生意嘅仁濟總理孫蔡吐媚（Mary）話，佢初初去印度設廠時，就要適應員工一日朝拜幾次，同埋用手食嘢嘅習慣。面對呢啲文化差異，都要尊重，但係有啲涉及健康，就要低調啲咁去改變人哋，都唔易做o架。
Mary嘅老公、饒宗頤學術館之友主席孫少文創辦嘅公司從事品牌標籤業務，規模喺全球數一數二，自然喺世界各地設有唔少廠。Mary最難忘係印度廠，初時覺得好奇怪，員工經常唔見晒，原來佢哋一日要朝拜好幾次。呢啲涉及宗教，唔止唔可以禁止，仲要為員工提供方便，所以佢哋就設立祈禱室畀員工用。
畀員工選擇進食方法
不過，用手食嘢嘅習慣唔多衞生，Mary話佢哋就喺飯堂提供筷子同刀叉，由員工自行選擇用中、西式餐具，或者用番手食都得。後來真係有當地員工改用餐具進食添！