政情：胡志偉寄語後輩 咪做「黃大仙」
一講起黃大仙，大家好自然聯想到「有求必應」，但「有求必應」又係咪真係一件好事呢？由做區議員助理出身、現任立法會議員胡志偉反而寄語年輕一輩嘅區議員，唔好用「黃大仙模式」去做事。但係有求而不應，似乎唔係區議員應做嘅事，唔通一向做事穩穩陣陣嘅志偉想教人將街坊「拒諸門外」？
籲做唔嚟勿怕拒絕要求
志偉就解釋，其實「有求必應」個「應」字，唔係「應酬」，而係「應對」，希望啲年輕人學識踏實工作。佢認為如果有個案係自己做唔到嘅，就唔好怕拒絕街坊，應先同街坊分析，然後再轉介個案畀上司，自己再從旁學習，而唔係明知自己冇能力都夾硬做，搞到弄巧反拙。
跟住佢仲教路，話唔好乜都做。佢認為做區議員應要有底線，舉個例子，好似通渠、整水喉呢類工作，雖然唔難做，但當街坊求助時就要搵番相關公司幫手，而唔係下下都落手落腳去做，以免畀人覺得區議員係「take it for granted（理所當然）」。話晒志偉扎根地區多年，經驗豐富，各位年輕一輩要學吓嘢喇！