政情：高永文重遇30年前病人

高永文（左）重遇三十年前骨科病人梁伯。（黃知樂攝）

獲對方贈手寫感謝狀

話說當年高永文仲喺瑪嘉烈醫院骨科部門工作。梁伯工作時遇到意外，右手被機器夾住，拇指及食指遭截斷，最初食指成功接駁，拇指則失敗。瑪嘉烈醫院之後再為梁伯做接肢手術，將右腳第二趾駁上拇指，手術十分成功，原來當年負責手術嘅醫生就係高永文。

• 梁伯手寫感謝狀予高永文。（受訪者提供）

梁伯就話，當年見到高永文好忙，連食飯時間都無，雖然一直好想向佢講聲多謝，但三十年嚟都苦無機會。佢聽太太講高永文尋日會出席仁愛堂活動，特意手寫感謝狀，仲親身到場送畀高永文，讚揚其仁心仁術。高永文見到梁伯時，即刻變身醫生，幫梁伯診症，左睇右睇，又關心佢手指嘅活動能力添！