政情：吳得掂妄想洗底
教育局局長吳克儉民望長期包尾，五年任期內醜聞不斷、劣迹斑斑，所以一直更被謔稱「吳得掂」、「外遊局長」等。喺尋日播放嘅專訪中，吳得掂就表明唔同意呢啲稱呼，除咗為自己辯護外，更自讚有政績添，果然自我感覺良好喎！其實，吳得掂之前都多次為自己平反，但係講極都冇人信，想洗底都洗唔甩。
吳得掂甫上任就鬧出國民教育風波，而多年來不斷外訪被外界批評係「外遊局長」，但佢竟然晒命指外訪比留喺香港工作辛苦。而佢更試過為咗去日本觀賞紅葉而缺席小三全港性系統評估（TSA）公聽會，可以話係現屆政府中最為惹火嘅官員。
講到「吳得掂」嘅外號時，佢就話為佢帶來警惕，會思考改花名嘅動機，同埋係咪有事實根據，亦會顧慮為他人改花名時，自己能否接受，迴避咗有冇畀外號搞到嬲嬲嘅問題喇！
稱業界明白外訪意義
至於被批評係「外遊局長」，佢就大嘆唔明白點解有呢個稱呼，懷疑呢啲名係有其他動機同背景，亦都透露業界明白外訪意義，接觸時唔會咁稱呼佢。佢更辯稱每次外訪都有清晰目標，兼且透露下月將會前往越南、緬甸跟進一帶一路獎學金添！睇嚟外界嘅批評佢都當係耳邊風。
之後吳得掂更把握機會大講政績以圖洗底，話自己妥善處理咗北區學位不足，同埋推行免費幼稚園教育，呢兩項為其局長生涯中最成功嘅政績，仲話其他地方冇五年十載做唔到，但香港只用三年就完成，所以有好大鼓舞同成就感咁話。
死撐要對自己有信心
而回顧任內嘅批評比讚賞多，佢就話被冤枉亦無悔服務社會，但就拒絕為自己評分，解釋因為任期未完結，而且由其他人評分較為適合，有助了解事實喎。佢更呼籲香港人要逐步走出「特別習慣」，即係只睇到自己不是，而忽略優點同前進地方，認為不妨要對自己有更多信心、更多欣賞。不過，佢就否認呢個講法係形容自己，只係講緊教育啫！
睇番成個專訪，吳得掂都係為自己過去五年表現辯護，企圖洗底，但可惜事與願違，反而凸顯出佢不知悔改嘅一面，真係弄巧反拙囉！