中環出更：蔡少森清晨跑山吸靈氣
近年愈嚟愈多香港人愛上行山，善用周末親近大自然，令到郊野公園人流拍得上市區！不過，樂極生悲事件偶有發生，所以行山時都要多加小心。早前海外潮人企業家協會（協會）舉行就職典禮，講開先知唔少人都有行山經歷，其中會董蔡少森（Philip）就話行入啲，避免碌落山。
Philip透露，一個星期起碼會去跑四至五次山，而佢多年來都習慣喺清晨時分出發，因為啱啱日出，山上嘅植物剛進行光合作用，所以釋出嘅氧氣係特別清新。佢更形容呢浸清新空氣為「靈氣」，大讚多吸收有助增強抵抗力，認為吸得多中氣都會特別好添，難怪佢會堅持呢個習慣成廿幾年！
林淑怡拉筋當運動
當日出席活動嘅仲有協會副主席林淑怡、協會秘書長林月萍、常董張俊勇、裕華國貨董事總監余偉傑同九龍潮州公會青委方溢等，而林淑怡就話生活忙碌，所以日常多以拉筋當運動，不過間中都會抽時間去行山。佢形容自己為穩陣派，行山只會行熟悉路線，而且會留意天色變化，一唔對路就即刻回程。
不過，佢就否認呢個態度代表為人唔願接受挑戰，更透露曾經喺外遊警示生效期間到訪以色列，因為衡量過局勢同得失先作出決定，認為自己只係小心行事啫！
另外身形健碩嘅余偉傑讀書時玩過多種運動，亦有跟朋友去行山，大讚香港景色宜人，但自爆裝備欠奉，只靠體能搭救喎。雖然行山準備不足，但佢對生意就有截然不同嘅態度，直指從事零售業要時常保持危機感，所以唔可以一成不變，更透露研究緊轉型添！
卓妮