政情：邵家輝遇「黑的」 嬲爆 掛橫額唱衰
立法會尋日討論發揮本地旅遊資源動議，當講到有關本地的士問題時，身兼區議員嘅批發零售界議員邵家輝，自爆曾被的士司機濫收車資，雖然佢當時即時報警處理，但因為的士司機逃之夭夭而未能人贓並獲，佢最後決定喺選區內掛橫額唱衰。
老蘭去銅鑼灣 索價400元
當提到香港旅遊業嘅問題，邵家輝大爆一年前曾被的士濫收車資，佢話當日凌晨三點出席完朋友嘅生日派對後，喺蘭桂坊外打算坐的士返銅鑼灣，點知的士司機開價四百大元，佢即時報警處理，但司機喺警察出現前已經逃之夭夭，佢當晚無奈由中環步行到上環先有的士返屋企。
佢話喺追究無門下，惟有喺寶馬山選區掛出橫額，提醒選民要小心「黑的」。佢又促請警方嚴厲執法，以免影響香港嘅形象，將濫收車資的司機釘牌。