政情：漢奸黎圖造王
特首選舉仲有幾日就投票，同美國關係密切、外號「漢奸黎」嘅壹傳媒黎智英，尋日再喺旗下刊物發功，吹捧特首候選人曾俊華（鬍鬚曾）坐擁高民望，有望好似五年前嘅梁振英咁，以民望脅迫中央，最後爆冷勝出。同日又有報章爆料，指稱早年移居美國嘅鬍鬚曾，其支持者與美國政府關係密切。其實鬍鬚曾所謂嘅高民望，正係由漢奸黎及獲佢資助嘅一眾民主派吹噓得來，隨時一投完票就會冧檔。鬍鬚曾尋日就兩度發表聲明，否認有意藉民望脅迫中央或獲得美國支持，令人懷疑佢或其支持者仍對北京有所求，唔想公開與漢奸黎綑綁，繼而走上與中央對抗嘅不歸路。
漢奸黎早前喺旗下兩大刊物《蘋果日報》及《壹週刊》同日發稿，自爆曾赴美會見多位美國鷹派前高官及軍方高層，並大讚新任總統特朗普嘅強硬對華政策，慌死外人唔知自己係「漢奸」。尋日佢再喺該兩份刊物撰文，讚到鬍鬚曾天上有、地下無。其中《壹週刊》更以封面故事報道，指鬍鬚曾擁有高民望呢件「終極武器」，加上盛傳獲得個別地產商支持，可以迫使中央轉為支持佢做特首。
勢「用完即棄」 民望一吹便散
不過，鬍鬚曾所謂嘅高民望，其實係由漢奸黎及民主派吹噓得來。佢哋之所以喺今次特首選舉力撐鬍鬚曾，主因就係盛傳佢不獲中央信任，「敵人的敵人就係朋友」。但若果中央支持嘅候選人最後順利勝出，民主派就會轉為集中火力攻擊新特首同新政府，立場與政綱與民主派南轅北轍嘅鬍鬚曾，勢將被「用完即棄」，民望如浮雲般一吹即散。
曾義工被揭與美關係密切
與此同時，有左派報章尋日為鬍鬚曾嘅一個義工組織「起底」，指當中兩名負責人曾任職一間與美國政府關係密切嘅公司。加上鬍鬚曾早年在美國定居、佢太太及子女均為美國籍等，令人更加確信佢不獲中央信任，好難好似當年嘅前政務司司長唐英年咁，喺參選特首落敗後迅速與北京修復關係。
面對上述報道，鬍鬚曾罕有地喺短短一日之內，兩度透過其競選辦公室發表嚴正聲明，其一係否認自己有意藉民望脅迫中央，其二係澄清佢及其義工均與外國勢力無關，並形容自己向來「克盡己力，報效國家」、「愛國愛港的基本立場從未動搖」等。好明顯兩份聲明嘅對象都係中央政府，反映鬍鬚曾或其支持者相當「淆底」，擔心選舉一完就會從高處跌到谷底！特首候選人仲有林鄭月娥及胡國興。