中環出更：網民惡搞駐港特派員公署fb
網上平台成為全球趨勢，中華人民共和國外交部駐香港特別行政區特派員公署（公署）前日亦以專頁形式登錄社交網站facebook（內地稱為「臉書」），該署署理特派員佟曉玲話會「積極回應網民關切」。唔少網民隨即留言談及臨近嘅特首選舉，亦有人質疑專頁係偽冒，因「臉書」多年來被內地當局封鎖，內地網民唔「翻牆」根本睇唔到。
公署嘅專頁首個發文先同網民打招呼，其後即指香港唔係一個國家，故公署負責同香港有關嘅外交事務。專頁又上載「官方帳號開通儀式」嘅照片，佟曉玲指中國係「世界網民第一大國」，期望透過「臉書」成為同香港民眾交流溝通嘅新平台，並會藉此介紹國家發展、外交工作、涉港外交等內容，亦積極回應網民關切。
寸爆「要翻牆先睇到」
專頁首三個發文係繁體字同廣東話口語，但香港人一般用嘅「嘅」卻寫成「噶」；而最新嘅發文則改為簡體字同書面語。唔少網民都到專頁留言，大部分提及特首選舉；亦有網民以簡體字留言，稱「在我們國家要翻牆才可以上臉書」，認為專頁係假冒。唔少留言更涉及內地敏感議題，例如有人問「劉曉波的面書甚麼時候可以開通」。
卓妮