中環出更：畀海鮮刮傷 高佬賢嗌報警？
早幾日喺短時間內連爆兩單食肉菌感染致命個案，日前卓妮喺沙田馬場見到立法會漁農界議員何俊賢（高佬賢），講起除咗污水之外，過往都曾有市民被海鮮刮傷感染，如果遇到應該點處理？佢就話自己未試過。咁萬一真係唔小心拮親點算？佢就話要報警喎！嚇到卓妮窒一窒，估計應該想講如果太嚴重就叫白車，但口快快講咗報警。
咁如果傷口只係好微細，高佬賢就話聽啲長輩講，可以用白醋溝水浸吓，不過佢都冇親身試過，都係嗰句有乜事都係睇醫生最穩陣啦！至於近日巴西逾三十間肉類出口商被揭發長年售賣腐肉，佢就話作為顧客單憑睇塊肉嘅表面真係睇唔出擺咗幾多年，惟有自己小心，太「平」嘅就要留意吓喇！
慎防腐肉 黃楚權話咪貪平
中電企業發展總裁莊偉茵及老公黃楚權都認同唔好貪平。話說黃楚權一向出名廚藝了得，兩公婆不時請朋友到家中食飯。至於畀海鮮整親點算？黃楚權話會第一時間「咇」啲血出嚟，身旁嘅「放射科女王」梁馮令儀都話正確，仲笑言以前做戲都有做啦，畀毒蛇咬親要啜啲血出嚟，所以拮親第一時間最重要係整番啲骨或污糟嘢出嚟之後消毒。莊偉茵就話最醒梗係索性唔好掂啦，凡係有殼嘅海鮮都叫老公幫手剝，但前提係要有個肯幫你剝嘅老公先得囉！
轉頭仲見到福建幫頭領、福建社團聯會永遠名譽會長盧文端同佢個仔菁英會主席盧金榮。盧金榮話好鍾意食雞翼，炸雞翼、滷水雞翼、可樂雞翼通通都啱，不過好多雞翼都係雪藏兼巴西進口，佢就直言唔怕死，細個餐餐食，一次過可以食十幾隻，食咗咁多年真係食到大。
卓妮