食肉菌無處不在 醫管局病入膏肓

大家不妨聽吓食衞局局長高永文點講吖。佢話喎，未必每宗感染個案都可以搵到源頭，市民最緊要注意個人同環境衞生。喂，成單嘢調查都仲未開始，已經第一時間封定後門，家陣既然搵唔到源頭，即係冇人需要負責，即係叫市民自求多福，再不負責任啲吖！

最離譜嘅係，病人由入院到過身短短十幾日間，接受過多次清創同截肢手術，家屬質疑院方點解唔一次過做晒，係咪耽誤治療時機，你估高永文點講？佢話有時病人嘅病徵未必可以引導醫護人員作較早診斷，又話醫護人員喺保障病人生命安全同保留肢體間要有平衡，噏咗一大堆廢話，無非都係為涉事醫護開脫，呢啲唔係醫醫相護又係乜！

醫療官僚大玩包庇，難怪公院醫療事故鑊鑊新鮮鑊鑊甘。就呢個零禮拜之嘛，開錯腦、換錯心、心臟病當肚痛……五花八門，無奇不有，唔少仲發生喺聯網龍頭醫院。正如「東方報業民意調查」顯示，大部分受訪者狠批醫管局質素下降，醫療事故成為常態喇。

公立醫院亂象叢生，有人歸咎資源不足。冇錯，醫管局行政架構臃腫，肥上瘦下，前線醫護七個蓋要冚十個煲，呢啲都係人所共知嘅事實，但私家醫院不論資源同人手都充足好多，點解一樣有咁多事故？呢，今年衞生署已經接獲兩宗私家醫院呈報嘅醫療風險警示事件，而舊年嘅七宗同類事件中，部分更導致病人永久喪失功能，都咪話唔大鑊。

講真，好多醫療事故其實都係涉及疏忽大意嘅低級錯誤，只要醫護人員做嘢上心啲，一人肯走多一步，好多其實都可以避免。不過嘥氣喇，每次公院爆大鑊，高官都好似高永文今次咁，大事化小，小事化了，結果同佢哋呢啲問責高官一樣，賴得幾應都唔使孭飛，犯錯零成本咯喎，唔出事至奇。

講開醫醫相護，小市民要追究醫生專業失當，簡直艱難過秋菊打官司，藝人夫婦囝囝不幸夭折，結果要花近十年、耗盡家財至叫做討回公道，就係最典型例子。市民想話增加醫委會非業內委員比例啫，部分醫生團體即刻鬼殺咁嘈，專業團體自己人圍威喂，叫市民點會對醫療系統有信心？

一句講晒，食肉菌無處不在，醫管局病入膏肓。上述民調顯示，大部分受訪者認為必須從根本改革醫管局，港府收到未吖？