政情：郭偉強裝車cam自保
正所謂「經一事、長一智」，呢句說話用喺立法會議員郭偉強身上就最啱嘞！佢早前因為交通意外，被票控不小心駕駛，罰款三千五百元，並須自費修讀駕駛改進課程，佢話嗰次事件後，即刻裝咗俗稱「車cam」嘅車頭攝影機，仲喺另一宗意外中，保障咗自己添！
曾遇意外 被罰上改進班
郭偉強話上個月自己喺另一次交通意外被撞時，好彩有車cam，已經唔使爭拗嘞，只要交出車cam畀警方做證據，法庭就可以以此為據。佢又話依家仍然會揸車，因為要接載太太同小朋友出入實在好難唔揸車，但一定會好小心。
對於今次嘅案件，佢認為以往多數要扣多過十分先需要上駕駛改進課程，但佢都好清楚，自己係公眾人物，裁判官可能會睇得緊啲，刑罰都會重啲，以作阻嚇，所以佢亦尊重裁決。