政情：陳曼琪體驗護理搬運器力量
安老事務委員會上星期去咗東京考察，同行嘅委員兼黃大仙區議員陳曼琪（Maggie）話三日兩夜嘅旅程參觀咗唔少東京市政府同私人機構嘅安老設施，了解到當地人口老化情況同安老政策，仲試玩咗一個照顧長者嘅設施。
赴日取經居家安老
Maggie話日本喺居家安老方面比香港完善，佢試戴咗一個用嚟協助護理員搬運嘅儀器，而戴咗個儀器之後本來要兩個護理員先可以完成嘅搬運工作，只要一個人就可以搞掂，減輕對護理員嘅需求。
佢覺得呢個儀器都幾方便，只要吹氣就可以令使用者突然力大無窮，而且就算佢咁瘦都可以輕易戴起。佢話呢種高科技儀器因為未普及，所以價錢會比較貴，佢建議香港政府買入之後租出去畀有需要人士，又認為儀器對居家安老照顧者有好大幫助。佢又話稍後安老事務委員會亦將開會討論有關事宜。