政情：律政司增DQ位 人事委會勢拉布

人事編制小組委員會今屆開始成為民主派拉布嘅新戰場，上年底委員會曾討論警務處開設一個總警司職位，擔任網絡安全同科技罪案調查科指揮官，被拉咗接近四節會議，審議進度緩慢。政府早前去信要求小組委員會喺下月十日、二十四日同二十五日，加開四節合共七個半小時嘅會議，並已獲建制派議員支持。據聞，加會嘅原因係政府憂慮民主派會再喺小組委員會拉布。

土木工程署開位亦遭質疑

有民主派議員承認，嚟緊有兩個項目佢哋都非常關注，將計劃用多啲時間討論。其中，律政司新開設負責政制及選舉事務嘅副首席政府律師職位，除咗就選舉提出法律意見之外，仲會處理選舉後出現嘅一系列選舉呈請以及司法覆核，有民主派議員就將事件同四個立法會議員劉小麗、姚松炎、梁國雄同羅冠聰，正被政府司法覆核其議員資格拉上關係，反問「無理由畀你開個位DQ議員啩？」仲揚言會拉布反對。

另外，亦有議員對土木工程拓展署開設四個首長級編外職位，以領導新設立嘅可持續大嶼辦事處有保留，亦會用多啲時間提問。

政府暫未設「死線」要求剪布

小組委員會主席葉劉淑儀就話拉布已經係新常態，佢主持會議時會按議事規則，如果議員問到咁上下，而問題又不斷重複，合情、合理、合法之下佢會將議案付諸表決。佢又話政府暫時未通知佢所謂嘅「死線」，亦未有人要求佢盡快剪布。

不過，議案就算喺小組委員會強行通過到，仍然要交上財委會審議，到時拉布招數又會再次上演，所以話淨係加會並唔係長遠可行之策，政府痛定思痛，諗下點處理拉布問題好過喇！