中環出更：胡志偉寫錯張德江職銜

特首選舉下周日投票，民主黨（白鴿黨）主席胡志偉前日去信國家主席習近平，表達對選舉嘅意見。不過，佢喺信入面提及，上年五月全國人大常委會委員長張德江嚟香港同民主派會面時，就甩轆寫錯張德江嘅職銜，由「全國人大常委會委員長」，寫錯做「全國人大常委會主席」，唔單止係甩轆，仲反映佢唔了解國情。

胡志偉喺信中話，對於最近有中央政府或駐港代表介入特首選舉嘅消息，例如有建制派選委曾公開表示收到拉票電話，令香港市民感到憤怒，仲會打擊特首選舉同未來特首嘅公信力，希望中央政府能制止干預同介入，避免加深市民對一國兩制嘅疑慮。

此外，佢喺信中又形容，白鴿黨認為特首選舉嘅結果將會係重要嘅分水嶺，希望下任特首能修補社會撕裂，市民對中央政府同一國兩制增加信心，令未來特首可以喺較和諧嘅社會氣氛下重啟政改，讓市民喺冇篩選嘅情況下可以一人一票選出特首。佢亦提及，希望中央政府能尊重香港市民，讓選委能按市民意願投票。

不過喺提出咁多要求之前，佢係咪應該惡補吓國情先呢？

卓妮