中環出更：楊位醒嘆飲食業春天是寒冬
春天伊始，萬物復甦，但原來春天對飲食業嚟講並唔係咁受歡迎。香港餐務管理協會楊位醒早前出席一個烹飪比賽時話，春天三至四月呢段時間係飲食業水深火熱嘅時期，亦係市民外出用膳消費嘅淡季，因為天氣開始潮濕，大家都冇晒胃口喎。佢又話食嘢講求不時不食，呢啲季節最啱就係食菜嘞！
楊位醒話過咗農曆新年親朋戚友外出食飯嘅旺季，三，四月天氣潮濕，大家都冇乜胃口，加上女士為迎接夏天，可能又想清減，所以都少啲外出食飯，飲食業自然冇咁多生意。咁天氣濕食乜好？佢就話正所謂「不時不食」，好似冬天咁大家多數食肉，協會統計發現舊年冬天臘腸最好賣，新派嘅黑松露臘腸、鵝肝臘腸都好受歡迎，但到三、四月啲菜最靚，白菜同菜心都甜，所以最好都係食菜咁話。
許曉暉煮餸學「肥媽」
為比賽主禮嘅民政事務局副局長許曉暉（Florence）素食多年，最常煮嘅係紫菜蛋花湯同粟米黃金餅，而為咗增加囡囡食素嘅興趣同營養均衡啲，佢會盡量煮五顏六色嘅蔬菜，等啲餸菜視覺上吸引啲，依家就連囡囡都鍾意食素多過食肉嘞！佢又話平時會睇「肥媽」Maria Cordero嘅飲食節目，因為可以學吓點樣買平餸，不過因為買蔬菜多，所以一百元蚊三餸一湯對佢嚟講都冇難度。
同場嘅油尖旺區議會主席葉傲冬話平時都會煮吓嘢食，最叻整紅酒炆牛肉，如果要啲牛肉炆得腍就要炆過夜，半夜去洗手間時就望吓有冇乾水，間唔中睇吓就得，但因為最近做健身keep fit，所以冇得食喇！佢又透露已經瘦咗十三公斤，至於瘦咗最大得着係乜嘢？佢就話︰「行得快咗囉！」
卓妮