家陣係互聯網嘅世紀，亦係高新科技嘅世紀，只要按個掣，訊息即時傳送到天涯海角，真係好方便（口架）。所以話啫，時代不斷進步，做人做事亦要與時並進，一味食古不化咯喎，只會阻住地球轉嘅咋。
呢，好似香港郵政咁吖，咪就係落後於時代嘅佼佼者囉。好簡單，隨着電腦及手機普及，除咗冇乜人寄信，處理郵包嘅效率又唔夠速遞公司揮，收費服務又有便利店頂替，香港郵政到底仲有乜存在價值，真係諗爆頭都諗唔到。最弊係郵政官僚懶到出汁，一味抱殘守缺，結果搞到郵局拍晒烏蠅，業績年年見紅，仲衰到被審計署狠批管理混亂十宗罪添。正常嚟講，一個機構不停蝕錢，應該諗辦法轉型求生喇，偏偏香港郵政例外，把口就話意見接受，其實hea做照舊，唔到你唔服o架。
冇冤枉嘅，目前全港有三架流動郵政車，美其名曰彌補郵政局未能覆蓋嘅不足，行走新界及九龍四十六個偏遠地點，講到好似好有用咁款，實際上虛有其表，廢到無朋友。本報記者連續兩日追蹤其中一架郵政車，結果發現基本上冇人幫襯，各地點都係到此一遊，郵政職員好得閒咪落車打電話吹水咯。沙田穗禾苑算係最旺吖，都係得三個客仔咁大把，兩日使用服務嘅市民十隻手指數得晒，隨時賺埋都唔夠畀油錢。
仲有喎，郵政車只會喺每個地點停留十五至三十分鐘，每星期只會嚟一、兩次，就算真係有市民想使用服務，都因為夾唔啱時間，最終又係要去番無雷公咁遠嘅郵局，簡直嘥氣。以觀塘樂華（北）邨為例吖，因為居民多數係長者，對郵政車服務有一定需求，點知香港郵政死都唔肯彈性增加服務，結果得物無所用。正如區議員話齋，要老人家企定定等根本不切實際，香港郵政死咕咕，踢都唔識郁，唔搞到怨聲載道至奇。
嗱，咪以為郵政車數目有限，唔會使好多錢，其實小數怕長計。審計報告早就踢爆，每架郵政車每年虧損逾一百萬元，加上多達八成郵局蝕到入骨，郵政基金廿年來足足有八年虧損、十四年達唔到固定資產目標回報率，屬於表現差勁嗰隻。冇計喇，郵政官僚腦袋仲停留喺咸豐年代，一本通書睇到底，點同人哋爭吖，多多錢都唔夠佢揈咯。
點講都好，世界變咗嘞，以前成街米舖，家陣想搵間睇吓都冇，睇怕郵政走入歷史係爭在遲早嘅咋。計功夫茶話齋，與其坐視郵政半死不活，不如一早執咗佢，幫納稅人慳番筆好過，至於郵政車咯喎，放入博物館啦！