政府近年對傳統香煙落重藥，包括多次加煙稅同放大煙包警告，但係對新興嘅電子煙就大歎慢板。食物及衞生局局長高永文尋日聲大大話「一個吸煙者都嫌多」，聲稱會考慮規管電子煙。但其實兩年前佢已經話過，會配合世界衞生組織防止非吸煙者同年輕人食電子煙，不過實際行動欠奉。現屆政府任期只剩番三個幾月，高永文有無得留低都未知，睇怕只能任由電子煙問題「爆煲」，等下一屆政府執手尾嘞！
