政情：父母情意結 邵家臻獨愛「工人」衫
貪靚並非女士專利，社會福利界立法會議員邵家臻雖然已屆中年，但衣着甚有個人風格，喺西裝骨骨嘅議事廳內，佢永遠只着帆布或牛仔質地嘅衫褲現身。雖然佢每個月最少買一次衫，但屋企衣櫃至今仍無一套正式西裝同領帶，仲話堅持要行「工人風」（Worker Style）喎！
遭戰友笑似「時裝騷」
公眾場合，着西裝最安全係常識。但邵家臻肯定係異類，帆布衫、牛仔工人褲、文青圓框眼鏡統統齊備，惟獨無西裝同領帶。佢話由細到大都無乜留意時裝，人着乜佢就着乜，但係十年前識咗一位做時裝買手嘅女朋友，自此成為「時裝精」，每個月都忍唔住手要買衫，尤愛「工人風」打扮。
出身基層嘅邵家臻話，由於父母都係藍領工人，所以對於工人風格嘅衣着有情意結，就連帽都揀郵差帽而非紳士帽；至於另一原因就係「工人風」衫褲價錢較低廉，唔使追名牌之餘，買二手衫褲反而更有味道添！邵家臻承認好貪靚，仲自爆有民主派戰友笑佢唔知係做社工，定係行時裝騷，但佢話咁樣無阻佢對時裝嘅堅持喎！