政情：梁裕龍重拾興趣 拉二胡籌款
香港眼科學會會長梁裕龍（Dexter）忙到飛起，兩年前佢重拾兒時興趣，向「二胡王子」王憓（Ray）學拉二胡，雖然技巧仲未好純熟，不過四月下旬佢就會孖住Ray登台獻藝。咁大膽，皆因呢場係慈善音樂會，目的係為奧比斯籌款，所以就算怕醜都要頂硬上喇！
兒時夢想做音樂家
Dexter笑言小時候嘅志願係做科學家或音樂家，鍾意音樂係因為當年爺爺做殯儀業，成日聽佢吹「啲打」，即係嗩吶，後來佢學咗打鼓同木琴先知自己音準麻麻，於是放棄讀音樂，中學揀讀理科，後來做埋眼科醫生。
直至兩年前佢終於學拉二胡，Dexter笑稱因為日日同視覺有障礙嘅病人一齊，心諗若果有朝一日自己盲咗，仲可以拉吓二胡，真係識講笑。Ray就話父親王國潼當日亦會演奏傑出盲人音樂家阿炳嘅代表名曲《二泉映月》，以體現對眼疾患者嘅支持。