政情：搞乜都衰 戴耀廷跌Watt到底

雷動計劃 失敗收場

戴耀廷搞到今日咁嘅田地，其實都係咎由自取。記得三年前，戴耀廷猶如泛民嘅「精神領袖」兼「理論大師」，佢提倡嘅商討日、公民投票、以及「愛與和平佔領中環」等理念同行動，獲得大部分泛民政團同支持者一呼百應，聲勢一時無兩。不過，隨着佔中行動畀班學生哥中途騎劫咗，之後行動完全失控，由愛與和平變成仇恨與暴力，到歷時七十九日都唔肯自行撤離，一度搞到一眾泛民政客民望急跌，去到邊都畀人鬧。

佔領清場後，戴耀廷仲唔識得收手，喺去年立法會選舉期間提出「雷動計劃」，揚言可透過指揮一班所謂嘅「智慧選民」配票，協助泛民候選人取得最多議席。該計劃結果當然又係失敗收場，多名資深泛民議員因不獲雷動配票或有人過度配票而落選，反而建制派喺多區都配票得宜，輸少當贏。

戴耀廷今次發起嘅特首民投，原意係喺泛民選委提名及投票選特首時，可以提供一個民意參考，但民投計劃本身已問題多多，包括被揭手機投票程式有私隱同保安漏洞，嚇怕唔少想參與投票嘅市民。再加上大部分泛民選委因為種種政治盤算，早已「自決」要支持其中一位建制派候選人，自然唔想畀呢個民投結果綑綁。

眾籌不足 愈搞愈蝕

結果三百多名泛民選委當中，只有約三、四十人承諾會根據民投結果投票。泛民政團唔肯積極為民投計劃宣傳，導致投票開始近一星期只得約四萬人投咗票、即原定人數嘅百分之四。戴耀廷原本希望眾籌一百五十萬元作為計劃嘅經費，暫時亦只籌到六十多萬元，一半都唔夠，最後可能唔夠錢找尾數添！戴耀廷尋日仲話要加開多幾個實體票站，希望趁臨尾幾日谷高個投票率喎，想法真係太天真兼太傻，隨時搞得多就蝕得仲多。