港珠澳大橋香港段應該實行「右上左落」定「左上右落」，引發唔少爭議，除咗因為政治原因，中港汽車一邊左軚，一邊右軚，行車安全亦係一大考慮。其實計功夫茶話齋，「左右不分」點止影響行車安全咁簡單，分分鐘搞出人命都有之。
唔係誇張o架！一名五旬女病人最近因為右邊頭顱內血管瘤出血，喺伊利沙伯醫院接受緊急開腦手術，點知一名神經外科醫生竟然錯誤打開病人一部分左頭顱骨，最後經一名麻醉科醫生提醒，由另一名醫生「執手尾」，即時為病人進行右頭顱開腦，呢位病人目前情況穩定，算係不幸中之大幸。
點解出現咁低級嘅錯誤？院方係咁講嘅，涉事醫生當時係根據初步所得嘅造影檢查影像，唔為意之下替病人進行緊急左頭顱開腦手術，所以先會出事。院方向病人及家屬致歉，又話會進行深入調查，避免同類事件發生喎。
咪玩喇！家陣講緊開腦，人命關天絕對唔講得笑，點可以一句「唔為意」就漫不經心亂咁嚟o架？仲有吖，聽聞出錯嘅醫生屬於副顧問級，最少有十年資歷，而開腦手術亦有嚴謹嘅程序，有多名醫護人員參與，點解一直無人發現有問題，仲爭啲鑄成大錯？
嗱，類似事故發生一、兩次，都仲可以話係個別人員麻痹大意，一而再、再而三咁發生，就肯定係整體醫療質素出咗問題。大家有眼見，呢類蝦碌嘢多到天光都數唔晒，幾年前東區醫院一名病人右膝受傷，結果醫生向左膝開刀，卒之搞到兩隻腳都有事；又試過有位病人原本應該接受右眼青光眼激光治療，醫生冇check清楚就向左眼發激光；甚至有公院試過將男女病人醫療數據撈亂，其他如輸錯血、派錯藥等，更加係無奇不有。
所以話，人的因素第一。上面咁多單嘢，只要醫護人員稍微認真少少跟多一眼就可以避免。講起都一殼眼淚，想當年香港醫療水平執亞洲區牛耳，可惜近年風水輪流轉，服務好似王小二過年，一年不如一年。幾年前菲律賓人質事件受害人喺香港進行三十幾次整形手術都失敗，反而喺台灣一take過搞掂，就係一大警號。部分前線質素參差已經擇使，最慘係醫管局長期以來肥上瘦下，前線醫護人員七個蓋冚十個煲。咪話唔提醒，隨着未來幾年醫護人員進入退休高峰期，人手只會更短絀，再咁落去，醫療事故只會陸續有來嘅咋！
有人形容市民一隻腳踏入公立醫院，等於半隻腳踏入閻王殿，真係一啲都冇誇張。特首候選人一個比一個吹得，治港藍圖講到天花龍鳳，市民連睇醫生都要提心吊膽，咪又係嘥鬼氣！