政情：今日你上鏡：魏麗霞暢談家品新潮流

早前見到香港商業專業評審中心常務副會長魏麗霞（Lisa），講起潮流興「快速時裝」、「快速消費」，做十蚊家品零售店起家而變身上市公司話事人嘅Lisa笑笑口話，快速消費時代來臨，依家市民買家居用品唔係追求耐用，而係樣靚、有型，呢個變化係佢入行廿五年來首見。

Lisa話，以前一樣好賣得嘅家品，可以五年不變，長賣長有，但係依家消費者貪新鮮，尤其係香港人蝸居細，鍾意物色樣靚、摩登嘅家品美化家居，令到家品零售業就好似時裝業一樣，成日要轉新款。佢哋有專人周圍去搜羅新玩意，除咗大本營韓國、日本之外，最近去多咗歐洲及內地，務求刺激市民嘅消費欲咁話。