政情：背囊友周浩鼎 搭車唔驚阻到人
最近大家對孭背囊搭交通工具議論紛紛，同為背囊友嘅立法會議員周浩鼎（Holden）就話唔怕搭車時會阻到人，事關佢所用嘅背囊體積唔太大，同埋早已習慣上車時會放低背囊喎！
上車放低用手拎
Holden並冇考車牌，所以要依賴交通工具出入。密密搭車嘅佢大嘆繁忙時間特別擠擁，所以早就養成一上車就放低背囊嘅習慣。不過佢唔會將背囊放落地下，而係改用手拎住，咁做梗係怕地下污糟喇！
Holden經常用背囊係為咗有更好承托力，而且可以空出雙手，以前喺英國讀書都經常孭背囊。佢話當年英國已經有唔少上班族都係用背囊，而唔係公事包，估計與當地人多數以單車代步有關。至於香港方面，佢留意到近年多咗西裝友孭背囊，可能同背囊款式愈嚟愈新穎有關，難怪佢成日着西裝襯背囊喇！