政情：區議員外訪咪預譚凱邦
政府由今屆區議會開始，向每名區議員提供每年一萬元的外訪開支，等議員可以用區議會名義進行外訪考察，唔少議員都非常興奮，多個區議會仲已經就外訪地點展開討論添。據聞，搶閘申請撥款的荃灣區議會，決定今年六月去珠海港珠澳大橋參觀，但該區區議員譚凱邦原來冇回鄉證，由於議員唔可以脫離區議會單獨行動，睇怕譚凱邦嗰一萬元都係「有得睇，冇得用」喇！
呻申津權利被剝削
區議會一直都不設外訪津貼，故無先例可循的情況下，議員可以自己外訪自己訂。荃灣區議會早前決定今年六月二至四日去珠海考察，並成立小組委員會跟進，行程包括考察港珠澳大橋等，每人大約會花二千八百元。
不過，民主派議員譚凱邦就炮轟去珠海不合理，話自己唔想返內地，而且一早已經「剪爛咗張回鄉證」，覺得自己使用外訪津貼的權利被剝削。佢仲質疑，議員挑選六月四日外訪，係阻止人出席六四晚會。譚凱邦話，佢有建議過去台灣，但無咩人支持，至於餘下的七千多元會否再搞多次外訪呢？區議會就仍然未討論。譚凱邦大鬧，建制派壟斷議會，佢作為少數不能反對。議會從來都係少數服從多數，況且又唔係內地沒收佢張回鄉證，只係佢自己選擇唔返內地啫，怪得邊個喎。不過，依家鬧都冇用喇，只能望門興嘆，睇住其他人去珠海考察。
話時話，屯門區議會亦同樣決定去珠海考察港珠澳大橋，早兩日已經成立工作小組處理添。據聞今次考察係因為屯門碼頭鄰近港珠澳大橋出口，議員都認同要去睇吓工程進度，如果有機會更加想去睇埋珠海灣區發展，估計今次去珠海唔會用光一萬元外訪開支，會有餘錢計劃下一次行程。其實外訪開支並非供議員吃喝玩樂，所以議員去邊度最緊要同公眾解釋清楚原因，帳目亦都要公開透明，否則難以同納稅人交代呀！