中環出更：現代女性難脫獨又關政府事？
婦女事務委員會早前舉行國際婦女節慶祝酒會，未婚嘅立法會議員容海恩（Eunice）都係座上客。Eunice直指現代女性最難係平衡工作同生活，除咗已婚女性受影響外，未婚女性都好容易因工作繁重而錯過終身幸福，唔通Eunice有貼身經歷，所以有感而發？
不過香港人忙係常態，Eunice都明白，所以就話應該多為未婚女士舉行活動，擴闊佢哋嘅社交圈子。不過佢並非打算搞快速約會，話簡單如周末去行山都有用喎！佢又話康文署多數只係舉辦社交舞，但社交舞嘅接觸面有限，認為要花吓心思，搞多啲唔同種類活動，去吸引不同人士參與。
男學護趨增 大多好細心
同場仲有婦女事務委員會主席劉靳麗娟、食物及衞生局副局長陳肇始、港鐵主席馬時亨及女婿劉仲恒等人。陳肇始話，香港男女漸趨平等，社會已減少用性別為職業定型。作為護理學教授嘅佢更發現，近年愈嚟愈多男性從事護士工作，男學生比例由以前不足一成，已經大增至二成五，估計呢個轉變與護士前景同貢獻有關。佢仲大讚男學生比女學生更加細心，所以話，性格比性別更為重要喎！
家有嬌妻及兩名女兒嘅馬時亨就講笑話，屋企一向由女性主導，佢喺屋企會「畀人點」喎，唔通佢暗示家中女權過高？不過女婿劉仲恒就踢爆話，馬時亨係「萬千寵愛在一身」就真，認為佢咁講只係因為太愛錫家人，所以遷就佢哋啫，根本唔存在畀人點（口架）！
卓妮