有人話，同一個錯誤，第一次犯係無知，第二次犯係愚蠢。照咁睇，港府喺保育方面不斷重複犯錯，次次都等到歷史建築被人拆到甩皮甩骨至識補鑊，咁就唔止無知愚蠢，直情係不可原諒吖。
嗱，位於屯門青山嘅一級歷史建築紅樓，咪就係現成例子囉。尋日古諮會開會，終於拍板將紅樓列為暫定古蹟，即係十二個月內唔可以進行拆卸。發展局係咁講嘅，會盡快將有關決定刊憲，並會利用呢段時間同業主磋商保育方案，古物事務監督亦會全面考慮係咪將暫定古蹟宣布為永久古蹟喎。
即係咁，紅樓係就係暫時避過一劫，但弊就弊在早已拆到蓉蓉爛爛。呢，早兩日之嘛，工人又偷雞拆窗，連牆磚都損毀埋，搞到成間屋搖搖欲墜，如果唔係居民報警，再次驚動關注團體及議員聲援，當局會咁快做嘢至奇。不過咪開心得咁早呀，紅樓最終係咪保得住真係講唔埋o架，好似何東花園咁，因為業主同港府傾唔掂數，暫定古蹟限期一過，咪又係拆到渣都冇，紅樓會唔會步何東花園後塵，仲要睇過至知。
都咪話唔激氣，港府一日到黑將保育掛喺嘴邊，實際上同葉公好龍冇乜分別，每次都係歷史建築危在旦夕先至裝模作樣出手補救，結果醫番都係殘廢喇，景賢里咪就係典型例子囉，雖然最終成功列為法定古蹟，但好多特色建築早就被拆毀，救都救唔番。又好似今次嘅主角紅樓吖，早於○九年已被港府列為一級歷史建築，點知之後就關人個關，直到新業主大興土木，搞到群情洶湧，港府先至知衰，有冇再離譜啲吖。
講開紅樓，唔可以唔提孫中山先生，事關呢度就係辛亥革命嘅香港基地，黃興呢位革命烈士都曾棲身於此，仲同孫中山一齊喺紅樓出面親手種植寓意革命一條心嘅桄榔樹添，保留到依家（口架）。最難得嘅係，內地唔止尊稱孫中山為革命先行者，慶祝活動仲比台灣有過之而無不及，反觀台灣雖以正統自居，但自從民進黨上台後，去蔣化甚至去孫化就未停過，講到底無非為台獨鋪路。家陣港府坐視辛亥革命遺迹任人摧殘，唔通想助長港獨？再講吖，港府開口埋口重推中史，加強國民教育云云，紅樓正正係香港同中國歷史紐帶嘅明證，保育應該唯恐不及喇，點可以置之不理（口架）。
咪話功夫茶唔提醒，連當今國家領導人都讚揚孫中山先生係「偉大嘅民族英雄、偉大嘅愛國主義者」，就知保育紅樓非常政治正確，正所謂唔睇僧面睇佛面，港產官僚蠢極都冇理由唔識點做啩。