政情：公屋聯會下周五換屆選舉 新舊勢力惡鬥爭做主席

文裕明開期票爭支持

據悉加入公屋聯會廿一年、現任公屋聯會副主席嘅文裕明係接任主席大熱人選，佢除咗獲得王坤點名支持外，本身較為政治中立嘅立場亦獲公屋聯會內一批執委認同；不過，活躍於九龍西地區事務嘅西九新動力，據聞有意派代表染指主席一職，到時或有一番惡鬥。

身兼新界社團聯會常務理事嘅文裕明接受查詢時承認，有人推薦其擔任主席，表明如執委會支持，願意接受新挑戰，佢又疑似開出期票爭取支持，指公屋聯會近年沒有代表於房屋委員會大會內，盼望日後爭取有公屋聯會代表加入。

西九新動力傳有意角逐

雖然文裕明被視為接任主席大熱，仍要面對西九新動力嘅新興崛起勢力，有傳兩名西九新動力中人，分別是現任公屋聯會副主席左匯雄同執行委員陳國偉，均有意更上一層樓，然而，有公屋聯會元老憂慮，若然新主席有政黨背景，會削弱公屋聯會公信力，呢個或者係擁有政黨背景人士「升呢」嘅最大阻力。