政情：百載村校展 兩小無猜話當年

元朗西北法定古蹟廈村鄧氏宗祠同友恭學校都有近百年歷史，最近有一批大專生應邀為友恭學校庭院設計大型裝置藝術作品，其中一個展品叫做「凝」，旨在透過鏡子設計捕捉傳統文化嘅同時，亦同祠堂風格形成新舊對比；同場仲有一批友恭學校嘅舊生、末代校長同九十多歲嘅老師出席話當年，當中包括一段兩小無猜嘅真人往事。其中舊生鄧錦輝同李錦雲想當年兩小無猜，雖然二人最終無成為一對，至今仍保持聯絡。李錦雲憶述，當年老師知道鄧錦輝性格怕醜，就特別搵四個女仔圍住佢坐，當有女仔叫鄧嘅名字時，對方就會面紅。鄧錦輝則提及往事，話自己喺友恭學校畢業後升中，仲有踩單車接李放學，回想當年十分單純。