中環出更：民政處疑派高仿頸巾跣區議員
網上熱傳「九成九高仿，等於百分百冒牌」嘅廣告對白，估唔到荃灣民政事務處疑似甩轆「中招」。荃灣區議員譚凱邦於社交網站發貼爆料，話日前收到一百份來自荃灣民政事務處嘅回歸二十周年禮品包，要求代為派發，不過，佢於驗貨時發現禮品包內嘅頸巾疑為時裝品牌H&M嘅高仿品，質疑民政處安排高仿品畀議員派係「畀個氹議員踩」，荃灣民政事務處晚上「補鑊」宣布停止派發，又會與承辦商跟進版權問題。
處方宣布停止派發
據譚凱邦透露，回歸二十周年禮品包入面有食物盒、清潔劑、襪及頸巾等日常物品，當中有針織人造棉頸巾包裝紙寫上HsM，佢懷疑係屬於H&M嘅高仿品。
譚估計，政府將採購過程外判，以致出現以上情況，但佢認為禮品包以公帑購入，當局於事件中責無旁貸，為此，佢已經去信要求當局解釋。
荃灣民政事務處晚上回覆指，禮品包涉及六千份，中標承辦商曾提供頸巾樣本相片，並沒有印上任何商標，處方已就事件通知區議員及其他有關團體停止派發，並與承辦商跟進頸巾包裝品版權問題，確保禮品包不會引起任何版權爭議。
卓妮