中環出更：李周美枝 難忘女童軍寒冬露營
參加制服團體、身穿整齊制服無疑能夠增添幾分帥氣，但制服多數係短袖而且單薄，若遇上天寒地凍嘅日子都幾難受。香港女童軍總會早前就喺寒冷天氣警告生效下舉行大會操暨嘉年華，香港總監李周美枝就話，女童軍制服其實可以抵禦寒冬，因為入面可以着冷衫，亦可以外加黑色外套。佢試過喺五度寒冬下參加露營，當日更出現豪雨搞到帳篷倒塌而改往室內過夜，聽到都覺得狼狽，難怪三十多年過去佢仍記憶猶新。
當日活動係總會成立一百周年嘅壓軸慶典，活動喺空曠嘅沙田馬場舉行，期間非常當風，唔少出席人士都嗌凍。不過向來醉心武術嘅名譽副會長王嘉恩竟然大讚天氣一流，事關佢練開武術，血氣行得較快，形容自己係「熱血少年」添！不過佢好怕熱，所以甚少前往熱帶地方旅行！
同場仲有名譽副會長鄧鳳賢、郭詩慧（Melody）及中西區分會會長李豐年等人。卓妮見鄧鳳賢及Melody都身穿女童軍短裙制服出席戶外活動，見到都覺得凍。Melody就自爆一早已有準備帶定暖包。
郭詩慧帶囝囝感受會操
Melody除咗冒住寒風出席外，更帶埋四歲幾嘅囝囝感受熱鬧氣氛。佢透露囝囝已經加入女童軍轄下、男女小朋友都可以參加嘅「快樂小蜜蜂」計劃，但由於囝囝當日只係陪佢出席，而且為咗參加嘉年華玩樂，所以就冇着制服到場，大家無緣見到佢哋齊齊着母子裝制服添！
卓妮