國之將亡，必出妖孽。香港之所以立立亂，後生仔之所以逢中必反，港府施政之所以寸步難行，佔中搞手之所以逍遙法外，梗係有原因啦。至於係乜嘢原因，嗱，家陣有人自揭底牌喇。
壹傳媒老闆黎智英有花朵你叫漢奸黎，當然唔係浪得虛名，佢老哥呢幾日喺旗下淫媒撰文，用極度自豪嘅口脗話畀人知，今時今日做漢奸唔單止唔使閃閃縮縮，仲光明正大得不知幾過癮。係咁嘅，佢自爆早前去咗美國華盛頓密會鷹派外交代表人物——前副國務卿及前常駐聯合國代表博爾頓，飲酒食飯直落之餘，漢奸黎發揮舔痔本色，狂讚美國總統特朗普對中國態度強硬做得好啱，又話特朗普打破慣例同台灣領導人蔡英文通電話，「唔係一時輕狂，而係深謀遠慮嘅神來之筆」喎。
可能漢奸黎冧功了得啩，博爾頓仲介紹咗一位小布殊時代嘅四星上將畀佢認識，嗰位上將原來又係特朗普粉絲，大讚新總統史上最聰明，又認為台灣唔可以對中國示弱，美國必須聯台抗中咁話。漢奸黎唔止聽到點晒頭，仲整咗句「上將，你講得太好啦」作結，嗰種獻媚醜態，唔到你唔服o架。奴才同洋主子相逢恨晚，漢奸黎話自己當日飲醉咗，其實係酒不醉人人自醉嘅啫。
歌仔都有得唱，「做隻貓做隻狗，不做情人」，漢奸黎選擇做美國人隻狗，梗係冇死錯人喇。大家都知，佢老哥以反中亂港為己任，咁多年來不遺餘力搞風搞雨，佔領之亂咪就係佢嘅代表作囉，唔止出錢出力，仲走上前台扮晒總指揮，偏偏港府奈佢唔何，到家陣都仲未落鑊。仲有喎，佢豢養一班反對派政客幫佢做政治打手早就街知巷聞，廉署亦早已就黑金事件立案調查，但查來查去得個吉。依家真相大白嘞，原來有洋主子喺背後撐腰，港府投鼠忌器咯喎，漢奸黎仲唔鬆毛鬆翼咩。
真係世界變咯，中國係就係出過唔少漢奸，但冇一個會敲鑼打鼓公告天下，好似汪精衞吖，到死嗰日都唔認係漢奸，都叫做有少少羞恥之心，點似得漢奸黎，唔以為恥，反以為榮，慌死冇人知咁款，愈賣國愈快樂。另一位李漢奸亦唔弱，公然將「我日日做漢奸，有需要就做漢奸」當歌仔咁唱，如果喺八國聯軍侵華年代，呢兩條友一定自告奮勇做帶路黨都似。
講到尾，有人做漢奸做到有恃無恐，做到揸住雞毛當令箭，咪就係拜港府無能怕事所賜囉。換着舊陣時，漢奸走狗人人得而誅之，點可能咁氣燄囂張吖。冇符喇，愛國愛港無前途，肥瘦漢奸打橫行，香港地烏煙瘴氣，家陣知點解喇！