政情：容海恩放假鍾意行街市

其實容海恩行街市係為咗做功課，希望考察唔同街市嘅情況後，再向政府提意見。佢參觀過秀茂坪街市，認為該區紙巾最平，而樂富街市就非常乾淨，令人對街市嘅印象大為改觀。佢亦去過啱啱完成翻新嘅東涌逸東邨街市，至於佢經常幫襯嘅就係大埔墟街市喇！

想「煮吓飯仔 飲啖湯」

容海恩話大埔墟街市賣嘅海鮮最新鮮，入面嘅熟食中心都有唔少好嘢食。佢仲話間中都會親身去街市買餸落廚，因為平時因工作關係經常喺街外用餐，所以趁假期都想煮吓飯仔，直言「飲啖湯都好」。睇唔出佢都有咁貼地嘅一面喎！