政情：EQ訪問小學生 了解壓力來源
依家好多人都話「要贏在起跑線」，唔少家長視學業成績為子女成功與否嘅指標，令學生嘅壓力大增。立法會議員葛珮帆（EQ）早前製作短片，訪問廿多個小學生，了解佢哋平日嘅功課量、測驗次數同學業壓力，最終發現並非所有學生都要完成大量功課，有啲學生即使每日有九份家課仍然覺得好開心。
EQ尋日同傳媒茶敍時播放咗一條小學生訪問短片，片中有學生指自己每日要完成九份家課，但仲覺得好開心「很喜歡做家課」，亦有學生指每星期都有測驗同考試，令佢哋缺乏休息時間，因而感到疲累同唔快樂。EQ話呢條短片係希望向大眾發出訊息，令大眾明白家課對學生嘅壓力係因人而異，政府亦需要就此作進一步研究，先可以針對性解決問題。
籲多方合作改善制度
教育局局長吳克儉（吳得掂）日前話做到任滿就退休嘞，即係下屆唔會留任，被問到係咪將吳得掂踢走就可以解決問題時，EQ強調教育制度有多重問題，唔係換走一個人就能解決。佢又希望家庭、學校同政府都能多啲了解小朋友嘅需要，從制度上令學校唔好將學生逼得太緊，例如喺小三全港性系統評估（TSA）嘅問題上，唔好唔合理咁強迫學生操練，先可以令佢哋有更多元嘅學習。