中環出更：長者義工修補撕裂「萬能膠」
圓玄學院、博愛醫院同仁愛堂早前合辦「傑義風采喜迎春」春茗，一千七百多位長者義工參加，當中仲有唔少一百歲人瑞添！圓玄學院主席陳國超話，佢哋三個堂義工加埋約五千人，舊年服務總時數超過廿萬個鐘，咁有心，梗要趁機嘉許呢班銀髮義工喇！
安老事務委員會主席林正財都有嚟撐場，佢話長者唔係社會負擔，而係力量，依家長者佔義工總數一成幾，證明香港雖然人口老化，但係長者都可以做義工，貢獻社會。特別係依家社會咁撕裂，希望長者義工可以好似萬能膠咁，將裂痕黐埋喎。
金刀梁喜見老友記
長者學苑發展基金委員會主席梁智鴻（金刀梁）已經連續十年出席呢個活動，佢形容自己都係長者，所以一定要嚟同班老友記歡聚。講到財政預算案將長者醫療券適用年齡由七十歲降至六十五歲，本身係泌尿科名醫嘅金刀梁讚揚係好事，事關「病向淺中醫」嘛！
當日博愛副主席李鋈發、李柏成、簡陳擷霞同總理韓嘉軒（Maggie）等多名董事局成員齊齊拉隊出席，好有「隊形」。卓妮見Maggie條頸好生硬，轉身都要就住就住，原來佢趁新年期間入院做頸椎手術，終於解決困擾多年嘅頸椎退化問題。簡陳擷霞就話健康最緊要，所以佢平時忙住湊孫，都堅持星期六、日放自己假，然後去游水、打網球，難怪佢身形保持得咁好喇！
卓妮