近年香港幾乎喺所有國際排名榜都拾級而下，簡直冇一瓣見得人，今勻終於威番次，取代英國倫敦，成為全球住宅租金最貴城市，更加拋離老對手新加坡幾條街添。不過呢個世界第一係光榮定係恥辱，大家心中有數喇。
「歐洲成本國際」調查各大城市兩三房單位租金，結果去年排第二嘅香港更上層樓成為全球No.1，將倫敦踢落第三位，第二位則由日本東京奪得。調查組織係咁講嘅，過去一年香港住宅租金有升無跌，而倫敦則受英國脫歐影響，令英鎊同租金齊齊下挫，所以唔夠香港揮喎。睇吓港府數據都知嘅嘞，去年本港中小型住宅租金節節上升，租金指數全年累升百分之零點六四，證明呢個世界第一並唔係浪得虛名o架。
租金係咁升，樓價係咁飆，炒家同業主就話發達啫，最慘情梗係無殼蝸牛啦。莫講話上車難過登天，就算租住危機四伏嘅劏房都唔容易，事關呎價媲美豪宅，仲要年年加租，問你點頂。呢，新財爺陳茂波日前發表財政預算案，結果派糖派到怨聲載道，尤其係「N無人士」乜都冇，連社福團體都質疑波叔「藐視窮人」。本來呢，輪候公屋成為無殼蝸牛嘅唯一希望，點知公屋落成量嚴重滯後，連波叔都認衰話未來五年公營房屋供應量大幅落後目標逾三成。輪候公屋人龍愈排愈長，民怨愈演愈烈，家陣知點解喇。
再講吖，租金貴絕全球，點止令社會深層次矛盾加劇咁簡單，長遠仲會影響本港競爭力。早前一項全球最佳求學城市排名，香港又插水，其中一個原因咪就係住屋成本驚人，令國際學生卻步囉。至於外資因為租金高企而過門不入，寧願去其他地方開公司，早就唔係新聞。咁你話喇，高租金係咪拖累香港吖？呢個世界第一係咪唔要都罷吖？
講到尾，呢啲都係啱啱下獄嘅前特首曾蔭權爵士一手造成。唔係咩，佢任內一味同富豪勾勾搭搭，施政傾向大財團，實行高地價、高樓價、高租金嘅「三高」政策，停建居屋之餘仲減建公屋，卒之禍延至今。最惡頂嘅係，佢老哥當年仲大言不慚話租金高企即係經濟好咁解，簡直同何不食肉糜嘅晉惠帝冇分別。畀麒麟撞一撞就話衰三年啫，香港畀佢搞足七年喎，點會唔有排衰呀。
都係嗰句，沒有安居，就沒有樂業，新一屆政府係咪有決心撥亂反正，全港市民都（目及）實。對無殼蝸牛嚟講，下屆特首邊個做唔緊要，最緊要解決樓價高、租金高嘅問題，如果唔係，政綱吹到天花龍鳳都係把鬼嘅咋。