政情：「樹根化」極速擴散周浩鼎「越追代包」

講到立法會「金句王」，自然會諗起民建聯（民記）嘅立法會前議員鍾樹根。樹根經常喺議事堂搞二次創作，例如「子烏虛有」、「明張目膽」等，但係「走了樹根，嚟個國鈞（黨友張國鈞）」，尋日就加埋周浩鼎，將「越俎代庖」讀成「越追代包」。睇嚟雖然樹根人唔喺議會，唔單止精神仍在，而「樹根化」仲急速擴散添！

「越俎代庖」嘅「俎」字，正確讀法應與「左」同音、而「庖」嘅正確讀音應與「刨」同音。若將「庖」讀成「包」，都可以理解為「有邊讀邊」，但點解周浩鼎將「俎」讀成「追」？就不得而知。

事緣係由於各式各樣有關特首選舉嘅傳聞喺坊間滿天飛，立法會議員黃碧雲尋日喺政制事務委員會會議上要求召開特別會議討論事件，周浩鼎隨即話有關選舉事宜若觸犯法例，選舉事務處就會處理，認為唔需要喺立法會事務委員會上處理，又批評若喺事務委員會上處理就係「越俎代庖」，意思上雖然正確，但發音就出錯。

周浩鼎經常喺辯論中以英語發言，話用英文辯論會多一份幽默，少一點「火花」，令大家冇咁躁，點知用中文發言竟然會發錯音，睇嚟佢要惡補吓啲中文，唔好顧此失彼嘞！

另外，政府喺會議上提及，二○一七選民登記運動預計喺下月初展開，直至六月底。而選舉事務處亦會預留約六百萬元，作為有關宣傳活動之用。