政情：胡炎松讚嘆澄海元宵百豬祭
向來熱衷於推廣潮州文化嘅潮州商會會董胡炎松，早前去完潮安同澄海兩地過元宵節，大開眼界。佢話澄海居民會舉行「賽大豬」，由村內男丁一人獻出一隻豬嚟祭祀神明，並將體形最大嘅豬隻排列喺最接近神明嘅位置。雖然財力有限者可兩人獻一豬，但鑑於當地人口眾多，獻豬數量動輒過百，場面極為壯觀。
潮汕習俗 米缸貼「春」
至於潮安嘅村民就會喺元宵節舉行「迎蔗燈」，村民喺道路兩旁手持由甘蔗挑起嘅燈籠，恭迎村落神明由廟宇移往祠堂祭祀。
胡炎松最近應青年委員會嘅邀請，喺定期聚會當中主持「潮汕文化三分鐘」嘅文化環節。講起潮汕人過年，牆壁同米缸唔係貼常見嘅「福」字，而係貼「春」字。原因係潮州話嘅「春」指春天，亦含儲存同剩餘嘅意思，仲有潮州人拜年一定要以長輩為先，否則就可能聽到「有心拜年初一二，無心拜年初三四」嘅埋怨說話喇！