政情：建制泛民休戰 度橋再鬥
立法會工務小組委員會前日喺混亂中通過涉及一百二十四億元嘅基本工程儲備基金整體撥款項目申請，立法會財務委員會今日最新議程顯示，基本工程儲備基金整體撥款項目已獲批准「打尖」成為首項議程審議。據了解，雖然民主派對基本工程儲備基金整體撥款項目中，部分具爭議項目被綑綁審議很有意見，但暫無意以衝擊方式阻止撥款通過，只會於四小時會議時間車輪戰提問，財委會主席陳健波亦因應財委會首度審議該項目，不會立即剪布表決。建制派及泛民表面齊休養生息，實際係推遲戰線度橋，留待四月一日死線前，即三月中再加會審議才正式決戰。
朱凱廸指無意激烈抗爭
據知基本工程儲備基金整體撥款項目審議時間無多，因為一如政府高官早前警告，如四月一日前仍未能於財委會通過該筆整體撥款，正在進行嘅工程或要停工，而新工程亦無法開展，據知政府立即去信財委會，提出優先處理基本工程儲備基金整體撥款項目，陳健波經考慮後開綠燈，基本工程儲備基金整體撥款項目申請於議程排第一，涉及一億二百多萬元的中學一筆過津貼等多個項目則押後審議。
對於基本工程儲備基金整體撥款項目突然闖關財委會，據知民主派對工務小組日前於混亂中強硬表決通過以上項目非常不滿，不過儘管如此，主張把橫洲項目抽出獨立審議的立法會議員朱凱廸透露，今日無意以激烈嘅方式進行抗爭，反而希望透過兩招，分別係改善審批制度以及同建制派協商，希望大家有共識地抽起具爭議性嘅項目。佢解釋，基本工程儲備基金內包含九千個項目，其實要問嘅問題好多，根本唔需要拉布。陳健波亦疑作出善意回應，指正考慮如何處理議員嘅要求，表明會畀時間予議員提問。
陳健波擬加會剪布應對
建制派及泛民似乎暫時先禮後兵，不過據知雙方只係暫時休戰，因為外界一般相信，今日財委會四小時會議難以就基本工程儲備基金整體撥款項目表決，加上四月一日前表決嘅死線臨近，有傳陳健波計劃於三月十七、十八日，加開六節合共十二小時會議，屆時陳健波就會出招劃線剪布，包括限制議員發言次數，亦會停收議員提出嘅臨時動議等。
若然該兩日合共十二小時會議仍未表決，消息指亦有兩手準備，就係於三月廿四或廿五日再加開會議作最後衝線。建制派消息稱，基於該撥款項目申請於工務小組前後討論近十五小時，今日唔剪布係免招口實，但剪布都係遲早嘅事，一句到尾，要發生嘅始終要發生，建制泛民難得嘅「默契」，似乎只係將剪布抗拉布嘅戰役推遲上演。