中環出更：廖偉麟難忘越級挑戰滑雪道
匯聚城中超級跑車迷嘅M超跑會早前搞咗個晚宴，香港中華總商會會董莊家豐（Edwin）同紀惠集團副主席廖偉麟（Jeffrey）都有到場，卓妮見佢哋雞啄唔斷，但並唔係傾緊揸車經，而係交流滑雪樂，Jeffrey仲介紹咗一款日本製滑雪板畀Edwin添！講起滑雪，Jeffrey諗起當年第一次去法國滑雪，初哥上場，點知睇錯標示，結果入咗一條難度高嘅滑雪道，沿途驚險萬分，佢笑稱畢生難忘。
Jeffrey憶述當時沿住懸崖一路向下滑，沿途有樹木、石頭，形容如果跌咗落去就冇命，最估唔到嘅係最終竟然滑咗兩個鐘先到終點，難怪佢一世難忘喇！依家佢就鍾意去日本滑雪，因為容易啲、舒服啲，早幾日先喺日本奈良滑完雪返港。
莊家豐靠「衝」成高手
Edwin都係滑雪高手，玩遍世界各個靚雪場，最鍾意都係日本，尤其係世界十大滑雪勝地北海道二世古。點解滑得咁叻？Edwin笑笑口形容自己唔怕死，又夠晒「衝」、「勇」喎。
講返晚宴，M超跑會主席馬仁威（Kelvin）、九巴後人雷怡暉（Amanda）等人都喺度。現場係鴨脷洲一座工廈內嘅中央廚房兼食堂，餐廳董事總經理Elliott特別準備拿手歐陸菜式畀大家食，個個食到舐舐脷。Kelvin就話依家已有四百幾位名人想加入M超跑會，但佢唔想一下子招收太多會員，都係慢慢先喇！
卓妮