阿陳是一名售貨員，工作時需要接觸不同的顧客。最近天氣乍暖還寒，他早上起床突然感到全身肌肉疼痛及發燒，之後更出現咳嗽、喉嚨痛及流鼻水等徵狀。阿陳以為只是普通傷風，沒有多加理會。數日後情況不但沒有改善，更感到呼吸困難，終需由家人送院治療。
經診斷後，醫生對阿陳及其家人解釋：「陳生因為感染流感，而併發肺炎。好彩發現得早，如果唔係可能有生命危險。」阿陳問：「咁嚴重？我仲以為自己係普通傷風。其實傷風同流感有咩分別？」
醫生回答：「流行性感冒係由流感病毒引致嘅急性呼吸道疾病，發病速度較急，患者會出現發燒、咳嗽、喉嚨痛、流鼻水、肌肉痛和頭痛等病徵，感染部位遍及身體各部分，而且有機會引起併發症；傷風係由其他病毒感染引起，常見有鼻病毒，病況較流感輕微，患者會逐漸出現喉嚨痛、流鼻水同鼻塞徵狀，發作部位主要集中係鼻同喉嚨，未必會發燒。」
阿陳說：「哦，咁可以點樣預防感染流感？」
醫生回答：「忽冷忽熱嘅天氣最易感染流感，例如一至三月、七月和八月係流感高峰期，需要多加警惕。要有效預防感染流感，可以接種流感疫苗，令身體慢慢產生抗體來預防流感及其併發症。另外，增強抵抗力，多做運動、飲食均衡及有充足休息亦有助預防流感。當然，養成良好嘅個人衞生習慣好重要，例如咳嗽或打噴嚏時，要用紙巾掩住口鼻，平時亦要勤加洗手。如果出現流感樣病徵，記住要盡早睇醫生。」
職業安全健康局
www.oshc.org.hk