財政預算案終於出爐，結果一如所料，庫房水浸，盈餘遠超預期。糖係就係照派，弊在熟口熟面，冇乜驚喜，你話唔令市民失望就假咯。
先睇吓財政預算案嘅主要內容吖。今次派糖金額約三百五十億元，同去年差不多，薪俸稅及利得稅退稅、綜援出雙糧、寬免差餉呢啲例牌菜當然唔少得，仲將出雙糧擴展至低收入在職家庭津貼、鼓勵就業交通津貼及明年推出嘅高額長者生活津貼添。至於薪俸稅邊際稅階亦略為擴闊，叫做惠及大部分基層及中產咁喇，但講到尾都係小恩小惠，小打小鬧，冇乜突破囉。
雖然話夕陽政府時日無多，不求有功但求無過，財爺陳茂波保守啲都可以理解，之但係以庫房盈餘高達九百多億元嚟講，取之於民，用之於民，惠民措施真係可以鬆手啲、做多啲。難怪連建制派議員都幫理不幫親，批評預算案「穩健有餘、氣魄不足」嘞。
咁又係呀，港府肥到襪都着唔到，話係世界上最富有嘅政府都冇誇張，但香港同時亦係全球貧富懸殊最嚴重嘅地區，兩個世界之最擺埋一齊，都咪話唔諷刺。搞成咁，做咗九年幾財爺嘅鬍鬚曾絕對要孭飛吖。
唔係咩，港府有錢成咁，偏偏善財難捨，斤斤計較，搞到社會深層次問題不斷惡化，日日家嘈屋閉，鬍鬚曾實在難辭其咎。佢貴為揸鎖匙嘅大掌櫃，一味做守財奴，年年估錯數不特止，仲要錯到離題萬丈，唔係廢柴係乜喎。淨係今個年度咋，佢老哥話庫房盈餘只有一百多億元，結果埋單計數相差成七倍，有冇再離譜啲吖。本來呢，如果善用資源，港府真係可以做到好多嘢，點知家陣年年估錯數，預算變失算，政府只能縛手縛腳，乜都做唔到，你話鬍鬚曾該當何罪！
睇吓數字就清楚嘞。回歸之初，港府財政儲備係一千七百多億元，家陣高達九千五百億元，翻咗幾倍。試問香港呢二十年來嘅經濟增長有冇數以倍計吖？打工仔嘅薪酬又有冇幾級跳升吖？答案當然係No啦。香港經濟增長就好似王小二過年咁，一年不如一年，而打工仔唔使凍薪減薪已經偷笑，遑論加幾倍人工。鬍鬚曾淨係識玩狼來了，唔係以「量入為出」做擋箭牌，就係以「結構性財赤」恐嚇市民，刻薄成咁，唔怪得個朵「史上最廢財爺」係人皆知喇。民怨愈演愈烈，反政府情緒一浪高於一浪，家陣知點解喇。
都係古人講得啱，官富而民窮，上溢而下漏，老百姓點會有好日子過o架。所以話啫，市民真係要帶眼識人，咪咁輕易畀啲政客嘅公關伎倆蒙蔽吖。