陳茂波（波叔）早前「升呢」做財政司司長時，已被外界批評唔夠班，質疑佢唔知點寫份預算案，佢尋日喺立法會發表呢屆政府最後一份預算案，政府盈餘近千億元，但竟然慳住荷包，稅務寬免同派糖少之又少，有部分建議冇派糖不特止，反而減甜添，畀議員炮轟預算案完全冇突破，又形容水浸庫房，但基層市民就水浸眼眉。原來波叔為要展示自己夠班做財爺，就係貫徹前財爺曾俊華嘅作風，做守財奴嘞！
