政情：為健康減肥 陳家洛轉食素
自從卸任立法會議員之後，陳家洛嘅工作冇咁忙碌，唔知係咪生活輕鬆咗，以致心廣體胖。佢話依家有六十六公斤，即大約一百四十五磅，為咗健康，呢排已開始減磅，希望可以減到兩至三公斤。咁有乜減肥方法？佢就話自己最近已經轉咗食素，希望可以有幫助。
其實今次已經係佢第二次食素，佢話第一次係四年前，啱啱做立法會議員嗰陣，但做議員成日都要出席活動，所以飲食上比較難配合，最終都係放棄咗，依家冇做議員，唔使應酬，加上太太同仔女都係食素，相信會容易實行好多喎。
鄰居遭老爆 表示冇有怕
講起大埔半山洲山頂花園有一間村屋早前喺除夕遭爆竊，損失咗二十幾萬元現金及首飾，連夾萬都不翼而飛，原來呢位苦主係陳家洛嘅鄰居。隔籬鄰舍被爆竊，一般都會有所警惕，咁陳家洛會唔會加強屋企嘅保安，例如加裝閉路電視咁呢？點知佢就話自己屋企冇嘢畀人偷喎，真係大安旨意喇！