政情:趙麗娟翻兜 重投鄉議局

香港會計師公會前會長趙麗娟喺今月獲委任為鄉議局增選議員,任期去到一九年五月尾。不過,佢早喺一五年已經成為增選議員,但上年年中突然辭去職務,所以今次不出一年就翻兜,實在令人意外。

為參選會計界選委辭職

有鄉議局執委認為趙麗娟喺短時間內翻兜嘅做法特別,更有人笑稱佢有「特異功能」先會短時間改變決定,又自稱作為「老鬼」唔認識佢喎。據了解,趙麗娟因增選議員嘅身份,喺舊年十二月舉行嘅選舉管理委員會界別分組選舉中,只能登記喺鄉議局功能界別中,所以需要辭職先可以重投會計界參選。

趙麗娟接受查詢時亦承認,選委選舉係佢離開鄉議局其一原因,但當時亦有私人事務需要處理,惟現時已經解決,可以重新擔任增選議員喎。佢又話一直以改善鄉議局管治同財政管理等為目標,又話只要鄉議局有需要,佢就會提供協助。趙麗娟今次大賣口乖,唔知鄉議局中人又受唔受落呢?

第一手消息請下載on.cc東網iPhone/iPad/Android/Windows Phone Apps