觀音廟通宵開庫，例牌吸引大量善信入廟借庫，香火鼎盛，好不熱鬧。梗係啦，觀音借庫水頭充足，永無托手（月爭），由三千萬到十億都借，點似得港府咁孤寒，坐擁金山銀山一樣做守財奴吖。
咁啱得咁蹺，今年觀音借庫同宣讀財政預算案撞埋同一日，觀音菩薩大慈大悲，來者不拒，皆大歡喜，如果財爺陳茂波繼續前任嘅孤寒財主路線，莫講話市民唔肯放過你，分分鐘連神仙都有火囉。唔係咩，受惠於賣地收入大幅超標，加上其他稅收較預期理想，庫房本年度鐵定錄得約八百億元盈餘，財政儲備亦首次突破九千二百億元大關，簡直肥到襪都着唔到，咁都唔開倉濟民，點都講唔通啦吓嘩？
尋日就有唔同團體去到政總請願，要求波叔積極有為，還富於民，交番張好好睇睇嘅成績表畀大家睇吓。除咗要求公屋免租一個月、重推電費補貼、減免全年差餉等例牌菜外，仲要求當局增加經常性開支，投資長遠發展。咁又係呀，以前鬍鬚曾年年估錯數又斤斤計較，淨係識派糖甜一甜嘴巴，唔止基層受惠有限，保守嘅理財作風仲搞到港府做嘢縛手縛腳，影響香港長遠競爭力。家陣新人事新作風，冇理由唔撥亂反正，臨尾為本屆政府洗吓底啫。
講開又講，早前外國機構連續二十三年評選香港為最自由經濟體，鬍鬚曾即刻叻唔切，話香港「財政健康」攞一百分，反映港府財政儲備雄厚令投資者有信心喎，即係自我貼金咁解喇。其實唔好話「小政府，大市場」呢種觀念已經開始out，淨係睇吓香港貧富懸殊愈演愈烈，官富民窮成為常態，一方面樓價競比天高，一方面劏房遍地開花，正常人都笑唔出嘞。咁當然，鬍鬚曾貴為年薪數百萬元嘅另類「中產」，淨係識歎咖啡睇法國電影，連粟米斑腩飯幾錢一份都矇查查，又點知民間疾苦吖。
所以話啫，波叔基層出身，點計都比鬍鬚曾貼地得多，社會對佢有期望係好合情合理嘅。不過唔知當局搞邊科，早前居然放風話今次財政預算案嘅派糖規模比上年縮水，原因係施政報告加推多項經常性及非經常性民生措施，需要近四百億元埋單，惟有減少派糖喎，唔係咁反高潮啩？
講到呢度，功夫茶諗起周文王向姜子牙請教治國之道嘅故事。姜子牙係咁講嘅，「王者之國，使人民富裕；霸者之國，使士人富裕；僅存之國，使大夫富裕；無道之國，國庫富裕，咁叫上溢而下漏。」家陣嘅香港，倉廩實而百姓虛，怨聲載道，如果港府唔想繼續做「無道之國」，咁就唔該學吓觀音大士有求必應喇。