政情：自爆獲借名跑車 陳淑莊有追求者？

澄清借車朋友有老婆

Tanya尋日喺飯敍時提到，自己由十九歲至二十九歲都有揸車，當年考車牌更加係「一take pass」，但後來因為泊車麻煩同不時撞花架車，於是就改為搭公共交通工具。佢自爆，雖然多年無再揸車，但近日竟然有朋友願意借出benz跑車畀佢喎，連身旁嘅黨友譚文豪都驚問，係乜嘢朋友咁闊綽？仲笑言要Tanya介紹畀佢識添！

聽到譚文豪都咁緊張追問，Tanya就解釋，願意借出跑車畀佢嘅朋友已經有老婆，叫大家唔好心多，跟住又寸譚文豪係立法會樓王，要跑車自己買就得喇！上年暑假曾經獨闖阿根廷嘅Tanya又透露，今年三月會獨自孭住背囊去伊朗旅行十日，今次要包頭巾又要包Patpat，都算係初體驗嘞！