政情：升呢波叔 過半日特首癮
由於前財政司司長曾俊華辭職，令原本做發展局局長嘅陳茂波（波叔）「升呢」接任財政司司長，不過波叔喺聽日就將會「更上一層樓」，皆因特首梁振英（CY）同政務司司長張建宗（小肥張）都將喺聽日到廣州訪問，至到夜晚先至返香港，所以波叔就要喺當日下午至夜晚署任特首一職，總算可以過半日特首癮。
CY本周四將會到深圳拜訪廣東省委常委、深圳市委書記、市長許勤，以及參觀香港大學深圳醫院，跟住就會再去廣州拜訪廣東省委書記胡春華。CY到深圳同廣州，同行嘅仲有政制及內地事務局局長譚志源，同埋行政長官辦公室主任邱騰華。
而小肥張當日上午就會署理特首職務，不過因為下晝佢都要陪同CY訪問廣州，故此喺CY同小肥張一齊離港期間，就要由波叔署任特首喇！雖然只有半日，但波叔總算嘗試到做特首嘅滋味，唔知佢又會唔會嫌時間太少，唔夠喉呢？