政情：微博貼文叫「早抖」？游蕙禎澄清未開戶
青年新政游蕙禎失去立法會議員資格後，動向仍受各界關注。最近微博出現咗一個名為「游蕙禎＿HK」嘅帳號，內容顯示首篇貼文出現喺周日（19日），首次貼文係希望大家多關照，其時近凌晨一時，仲叫大家「早抖」。難道游蕙禎都開設微博發布訊息？
游蕙禎尋日就喺社交網站facebook（fb）張貼呢幅微博嘅截圖，澄清嗰個帳號未獲佢授權，佢自己亦從來唔用微博，但就指嗰個帳戶持有人「幾有心機」，出一個貼文就搜集咗十幾二十張相做插圖，自己就冇咁勤力，只會放一張，又話唔明白點解嗰個帳戶到依家仍未被禁。
雖然嗰個帳戶唔係游蕙禎開設，但貼文並唔負面，內容亦係模仿佢本人第一身嘅寫法，更緊貼游蕙禎相關嘅時事。未知係咪有熱心粉絲，為佢爭取微博用戶嘅支持度呢？