中環出更：為跑畢10K嚴志明苦練一年
近年運動風氣盛行，多咗好多大型運動比賽舉行，其中馬拉松都係一個頗受歡迎嘅項目，卓妮日前喺一個公開場合見到香港工業總會（工總）副主席嚴志明，講起佢早前同工總主席鄭文聰一齊參加長跑賽事，佢就笑言目標係唔使搭巴士走，完成十公里。
講起點解會突然間的起心肝長跑，嚴志明透露係因為幾年前同鄭文聰一齊參加三公里賽事，諗住唔需要練習，點知原來好辛苦，仲輸咗畀生產力促進局總裁麥鄧碧儀，於是決心同鄭文聰練習咗一年，喺沙田馬場泊低車之後就跑去科學園，來回剛好十公里。
黃進達籲跑步勿操過量
佢哋工總仲因為咁而出咗一個運動品牌，同多間廠商合作生產運動用品如跑步套裝等。
至於香港旅遊業議會主席黃進達，佢平時亦有跑開十公里，但因為農曆新年工作比較忙，加上熱門賽事報名比較困難，但閒時佢都會圍住馬場或喺港島練跑，指跑八個圈就差唔多十公里，約需一小時，但體重重啲嘅時候就會跑得比較慢，認為跑吓步對身體好，不過就唔好操過量。
轉頭見到香港馬主協會會長史立德同太太史顏景蓮，史立德話佢哋協會都有派成員參加馬拉松賽事，而佢就負責支援同喺終點歡迎佢哋。菁英會主席盧金榮就唔啱跑步， 反而鍾意游水，每個星期都游兩三次， 最多可以游二十幾個塘，佢仲話成家都識得游水，太太仲好鍾意曬太陽添，而假日佢哋有時會同兩個女玩，游水嘅時候鬥游得快。
卓妮