政情：房署撈亂信件 鄭松泰變郭家麒
今屆立法會比較多新議員，不過開咗會已經一段時間，冇理由仲會搞錯議員㗎！但房署外判嘅顧問公司，就將兩封寄畀唔同立法會議員嘅信件，入落同一信封寄出，當事人分別係熱血公民鄭松泰同公民黨（公文袋）郭家麒。兩人嘅辦事處又唔喺同一層，再加埋郭家麒都唔係新人，冇理由咁都會搞錯喎。
對抽搶議辦身份曝光
鄭松泰早排收到一封由郭家麒助理發出嘅電郵，指房署外判嘅顧問公司，將寄畀鄭松泰嘅信，疊埋咗落郭家麒度，問鄭松泰會唔會拎番封信？事緣係由於兩人都係新界西嘅議員，咁啱佢哋又申請喺青衣長亨邨嘅議員辦事處，而因為保密關係，房署就冇向鄭松泰透露係邊個同佢對抽。但係依家因為房署外判商甩轆，就將兩人對抽嘅事公開咗，而佢哋兩人都覺得冇乜嘢嘅。
不過最令人百思不得其解嘅，係點解會出現甩轆情況。到底係鄭松泰太新？定係郭家麒知名度相對較低所致？睇嚟大家都要諗吓點樣提高知名度，費事又再出現同類事件喇！
